Mjeku epidemiolog Ilir Alimehmeti, në një intervistë për News 24, komentoi mbi skandalin që ka përfshirë disa mjekë në spitalin Onkologjik të Qendrës Spitalore Universitare Nënë Tereza (QSUNT), duke theksuar se ligji duhet të jetë i drejtë për të gjithë dhe se sistemi shëndetësor ka nevojë për reforma urgjente.
“Ky episod duhet të na zgjojë, pse ndodhin këto situata? Po sikur të kishim salla mjaftueshëm dhe mjekë mjaftueshëm, apo të ishin blerë sasitë e duhura të medikamenteve në kohën e duhur, a mund të krijoheshin kaq lehtë këto skema?” tha Alimehmeti, duke vënë në dukje se mungesa e resurseve dhe planifikimi i dobët kontribuojnë në krijimin e skemave korruptive në shëndetësi.
Ai gjithashtu kritikoi faktin që mjekët që po bëjnë specializimin në onkologji nuk paguhen gjatë viteve të studimit të tyre. “Pesë mjekë që po bëjnë specializimin për onkolog do të paguhet 0 lekë për 4 vitet e studimit të tij. A pyet kush se me çfarë do të jetojë ky mjeku i ri këto 4 vjet? Ose do të shkojnë në privat për të punuar, ose do të gjehen format, ja kaq e thjeshtë është,” tha Alimehmeti, duke theksuar vështirësitë financiare me të cilat përballen mjekët e rinj gjatë periudhës së specializimit.
Komentet e Alimehmetit vijnë pas zbulimit të një skandali në spitalin Onkologjik të QSUNT, ku disa mjekë janë akuzuar për praktika korruptive dhe përfitim personal në dëm të pacientëve. Skandali ka ngjallur reagime të forta dhe ka vënë në qendër të vëmendjes problemet sistematike në sektorin e shëndetësisë në Shqipëri.
Në përfundim, Alimehmeti theksoi nevojën për veprime konkrete dhe reforma në sistemin shëndetësor për të parandaluar përsëritjen e rasteve të tilla dhe për të siguruar që ligji të zbatohet njësoj për të gjithë. “Është koha që të marrim masa të forta dhe të reformojmë sistemin shëndetësor për të mbrojtur qytetarët dhe për të garantuar një shërbim shëndetësor të drejtë dhe transparent,” përfundoi ai.
