Deputeti i Partisë Mundësia, Agron Shehaj, ka ngritur një alarm publik duke denoncuar atë që e cilëson si një skandal të rëndë institucional. Sipas tij, përmes AKSHI, është ndërhyrë në të dhënat e Agjencia Shtetërore e Kadastrës, ku dyshohet se janë ndryshuar pronarë pronash, çështje për të cilën po heton SPAK.
Në një postim në rrjetet sociale, Shehaj shprehet se kjo situatë përbën një kërcënim të drejtpërdrejtë për pronën dhe sigurinë juridike të çdo qytetari, duke theksuar fuqinë e jashtëzakonshme që ka AKSHI mbi të dhënat personale dhe institucionale të shqiptarëve.
Sipas deputetit, pavarësisht hetimeve të SPAK dhe masës së arrestit në shtëpi, drejtoresha e AKSHI-t, Mirlinda Karçanaj, vijon të mbahet në detyrë me mbështetjen e kryeministrit Edi Rama.
Më poshtë, postimi i plotë i Agron Shehajt:
“Para disa ditësh, një miku im më shkruajti e më tha: ‘Mora përgjigje të analizave të gjakut në e-Albania.
Çfarë do të thotë kjo, që Mirlinda Karçanaj dhe banda e saj, apo edhe qeveria, dinë çdo lloj informacioni? Dinë edhe përgjigjet e analizave të gjakut që mora unë?’
Përgjigjja është: Po! Absolutisht, po.
Por jo vetëm kaq. Çfarë është më e rëndë, është që SPAK-u ka zbuluar që, nëpërmjet AKSHI-t, kanë futur duart në Kadastër, kanë ndryshuar pronarët e disa pronave dhe për këtë po heton SPAK-u.
Është e paimagjinueshme pushteti që ka AKSHI dhe drejtoresha e Edi Ramës që vazhdon të jetë në detyrë, pavarësisht se SPAK-u e ka vendosur në arrest në shtëpi.
Mund të fusin duart kudo. Kanë në dorë pronat tona.
Kanë çdo lloj informacioni që ka të bëjë me jetën tonë të përditshme: nga gjendja jonë shëndetësore, sëmundjet, ilaçet, hyrjet dhe daljet në Shqipëri, gjobat që marrim.
Çdo lloj informacioni që kalon nëpërmjet AKSHI-t është në dorë të Mirlinda Karçanaj, për të cilën SPAK-u thotë që është pjesë e një bande kriminale.
Dhe Edi Rama vazhdon ta mbajë në detyrë.
Duhet të zgjohemi. Është skandal ajo që po ndodh.
Jeta jonë, jeta e çdo qytetari të Shqipërisë, është në duart e Mirlinda Karçanaj, një anëtare e një bande kriminale, që Edi Rama vazhdon ta mbajë në detyrë.”
Denoncimi i Shehajt vjen në një kohë kur hetimet e SPAK ndaj strukturave shtetërore dhe përdorimit të sistemeve publike janë zgjeruar, duke ngritur shqetësime serioze për sigurinë e të dhënave dhe mbrojtjen e pronës private në vend.
