Ditën e sotme është vetëdorëzuar në polici, Griseldo Kusi, njëri prej vëllezërve, që akuzohen për vrasjen e punëtorit të kondicionerit, Indrit Çelaj.
I akuzuari u paraqit në polici së bashku me avokatin e tij.
Griseldo dhe Albano Kusi, ishin në kërkim për vrasjen e Indrit Çelajt, ngjarje kjo e regjistruar më 22 gusht.
Çelaj ishte duke rregulluar kondicionerin që pikonte dhe pas një debati, u qëllua me plumb në kokë.
Vrasja ndodhi në vilën e Bujar Kusit në zonën e Myslym Shyrit në Tiranë.
Fillimisht vëllezërit Kusi, i kërkuan shokut të tyre, Lorenc Veliaj që të merrte përsipër krimin.
E vërteta u zbulua pas përgjimeve në ambjentet e paraburgimit, midis Veliajt dhe të ndaluarve të tjerë.
Përvec Veliajt, policia arrestoi edhe Bujar Kusin, Ali Sulën, Ferdinand Bakallin, i cili ishte administratori i firmës, për të cilën punonte viktima.
Vëllezërit Kusi nuk janë emra të panjohur për drejtësinë.
Ata janë gjykuar për vrasje, plagosje dhe kanosje në të shkuarën.
