Një akt vandal është regjistruar në Universitetin e Salentos në Itali, ku është dëmtuar pllaka përkujtimore që nderonte Ilaria Sulën, studenten shqiptare 22-vjeçare e vrarë tragjikisht në Romë nga ish-i dashuri i saj, Mark Samson.
Ngjarja ndodhi në një nga klasat e universitetit, ku pllaka me mbishkrimin: “Kjo karrige i përket Ilaria Sulës, e vrarë nga femicidi. Ajo do të duhej të ishte sot në klasë” ishte dëmtuar qëllimisht, pasi fjalën “femincidio” dikush e kishte fshirë me stilolaps të zi.
Reagimi i Departamentit të Shkencave Humane dhe Sociale m ishte i menjëhershëm, duke dënuar veprimin si një sjellje të papranueshme dhe ofenduese ndaj kujtimit të Ilarias dhe të gjitha viktimave të dhunës gjinore.
Në një deklaratë, ata theksuan se ky akt shkel vlerat e respektit dhe përgjegjësisë civile që promovohen në universitet dhe riafirmuan angazhimin për luftën kundër dhunës me bazë gjinore përmes edukimit dhe ndërgjegjësimit.
Familja e Ilarias është tronditur thellë nga ky akt. Babai i saj, Flamur Sula, shprehu dhimbjen dhe indinjatën në një deklaratë publike: “Ofendohet kujtimi i saj dhe i të gjitha vajzave që kanë paguar me jetë. Jam i shokuar, por kjo tregon realitetin e botës ku jetojmë.”
Ilaria Sula u zhduk më 25 mars dhe u gjet e vrarë më 2 prill brenda një valixheje.
Ish-i dashuri i saj filipinas pranoi se e kishte vrarë me thikë në banesën e tij në Romë dhe më pas fshehur trupin. Ai akuzohet për vrasje me paramendim dhe fshehje të kufomës, ndërsa nëna e tij po hetohet për bashkëpunim.
Në rrëfimin e tij, ai tregoi edhe momentin kur ndaloi për të blerë cigare, duke pasur trupin e pajetë të Ilarias në makinë.
