Inspektoriati Ndërtimor i Tiranës, ditën e sotme ka nisur një aksion për prishjen e banesave në zonën e Shkozës.
Sipas “Balkanweb”, inspektorët kanë hasur në kundërshtimin e disa banorëve.
Për këtë arsye është dashur ndëryrja e forcave të policisë.
Mësohet se efektivët kanë shoqëruar dy persona.
Banorët ndërkohë akuzojnë policinë se ka ushtruar dhunë fizike dhe psikologjike ndaj banorëve të zonës.
Më tej ata deklarojnë se shtëpitë që duan të prishin, 4 janë të legalizuara, ndërsa tjetra është në proces.
Banorët kanë kërkuar gjithashtu nga inspektorët një vendim për prishjen e shtëpive, por këto të fundit deri tani nuk kanë paraqitur asnjë dokument.
Në vendngjarje ndodhen edhe punonjësit e OSHEE, të cilat do të bëjnë ndërprerjen e dritave, për t’i hapur rrugë prishjes së banesave.
