Pronarët e disa objekteve në hyrje të Shkodrës po kundërshtojnë prishjen e ndërtimeve nga IKMT, e cila po vepron në kuadër të projektit për hyrjen e qytetit.
Sipas tyre, shembjet po kryhen pa një interes të qartë publik dhe me vendime të paligjshme.
Fabion Murrizi, avokat i Muarrem Shkjaut, deklaron se vendimi i IKMT-së është i pajustifikuar, pasi objektet po prishen thjesht për të mbjellë disa pemë.
Ndërkohë, një nga pronarët e prekur, Ardit Sheqi, thekson se prishja e shtëpisë dhe biznesit të tij po bëhet pa u finalizuar procesi i shpronësimit, duke e lënë familjen e tij në një situatë të pasigurt.
Sipas pronarëve, vlerat e shpronësimit të ofruara nga shteti janë qesharake dhe ata kanë paralajmëruar ndjekjen e çështjes deri në gjykatat ndërkombëtare.
IKMT deri më tani ka shembur 10 objekte në këtë zonë, të gjitha me certifikata pronësie, ndërsa vlera totale e shpronësimeve pritet të arrijë rreth 4 milionë euro. Po ashtu, më herët janë prishur edhe 11 ndërtesa pa leje, si pjesë e të njëjtit projekt.
