Rezultatet e ekspertizës mjeko-ligjore për tre shqiptarët që humbën jetën të hënën pasdite në autostradën Egnatia zbulojnë detaje tronditëse mbi ngjarjen. Sipas protothema.gr, viktimat ishin ende gjallë kur makina shpërtheu në flakë pas përplasjes fatale me një kamion, megjithëse ishin pa ndjenja për shkak të lëndimeve të rënda.
Autopsia tregoi se trupat kishin plagë të rënda në kokë, gjoks dhe bark, brinjë të thyera dhe dëmtime të organeve të brendshme. Shoferi i mjetit kishte pësuar thyerje të kafkës. Goditja nga kamioni ndodhi në anën ku ndodhej karburanti, duke shkaktuar shpërthimin e menjëhershëm dhe përfshirjen e makinës nga flakët.
Hetuesit konfirmojnë se viktimat nuk humbën jetën nga përplasja e fortë, por nga zjarri që shpërtheu menjëherë më pas, në një moment kur ata ndodheshin në gjendje të fikëti.
Ndërkohë, personat e plagosur pritet të lënë spitalin, ndërsa shoferi bullgar i kamionit do të qëndrojë në paraburgim deri në publikimin e analizave toksikologjike, që do të tregojnë nëse ai kishte konsumuar alkool. Ai akuzohet për vrasje nga pakujdesia, lëndime trupore dhe drejtim të rrezikshëm të mjetit. Një ekspert mjeko-ligjor është caktuar gjithashtu për të përcaktuar shpejtësinë e kamionit në momentin e përplasjes, e cila mund të vendosë nëse çështja do të trajtohet si krim.
