Aksidenti i radhës ka ndodhur në minierën e Bulqizës ditën e sotme. Ngjarja ka ndodhur në minierën e Albchrome, ku është aksidentuar minatori 31-vjeçar Edi Beka. I riu është transportuar me helikopter drejt Tiranës, pasi spitali i Bulqizës nuk ofron mjekim të specializuar. Sindikata e Minatorëve të Bashkuar të Bulqizës ka denoncuar ngjarjen, duke thënë se kompania Albchrome ia ka hedhur fajin minatorit për ngjarjen, ndërsa thotë se në noftimin e policisë as nuk bëhet public emri i kompanisë.
Postimi i SMBB:
Një ngjarje e rëndë ka ndodhur sot në minierën e Albchrome, ku minatori 31-vjeçar Edi Beka është aksidentuar në galeri dhe është transportuar me helikopter për në Tiranë.
Ironikisht, në deklaratën e policisë nuk përcaktohet se në cilën minierë dhe kompani ka ndodhur ky aksident. Ndërsa kompania Albchrome sërish ia hedh fajin minatorit për aksidentin.
Që prej 2019, si SMBB kemi luftuar që jeta e punëtorëve të jetë sa më e sigurt, por shfrytëzimi pa kriter i pronarëve dhe heshtja shtetërore po i kthen këto miniera në varre masive.
U kërkojmë institucioneve përkatëse të hetojnë ngjarjen deri në fund dhe i urojmë vëllait tonë, minatorit Edi Beka, shërim sa më të shpejtë.
Njoftimi i policisë:
Bulqizë/ informacion paraprak
Me datë 24.03.2021, rreth orës 11.05, në një galeri kromi në Bulqizë, dyshohet se gjatë punës është dëmtuar shtetasi E. B., 31 vjeç, banues në Bulqizë, i cili është dërguar për ndihmë mjekësore më të specializuar drejt Tiranës.
Grupi hetimore ndodhet në vendngjarje, po kryen veprimet për zbardhjen e shkaqeve të ngjarjes.
