Një aksident i rëndë rrugor ka ndodhur paraditen e sotme, rreth orës 11:00, në zonën e njohur si “Rotondo e Levanit”, ku dy automjete janë përplasur me forcë, duke shkaktuar humbjen e jetës së një personi dhe plagosjen e pesë të tjerëve.
Viktima është identifikuar si Luftar Bracja, 51 vjeç, drejtues i njërës prej makinave të përfshira në aksident. Ndërsa mes të plagosurve ndodhet edhe Ilir Pujo, drejtuesi i automjetit tjetër, si dhe katër pasagjerë që po udhëtonin me të.
Sipas të dhënave paraprake nga policia, dyshohet se Ilir Pujo ka humbur ndjenjat teksa ndodhej në timon, duke humbur kontrollin mbi mjetin dhe duke u përplasur me automjetin që kishte përpara. Për pasojë, një nga makinat ka përfunduar jashtë rruge, në një kanal anësor.
Në vendin e ngjarjes ndodhen forcat e policisë dhe grupi hetimor, të cilët po punojnë për të zbardhur me saktësi rrethanat dhe dinamikën e këtij aksidenti fatal.
Pamjet nga vendngjarja tregojnë qartë dëmet e mëdha të shkaktuara nga përplasja, ndërsa hetimet paraprake vijojnë.
