Udhëheqësi sirian Ahmed al-Sharaa ka njoftuar krijimin e një qeverie të re kalimtare me 23 anëtarë, e cila synon të bashkojë vendin pas rrëzimit të ish-presidentit Bashar al-Assad.
Kabineti përfshin përfaqësues nga grupe të ndryshme etnike dhe fetare, në një përpjekje për të ndërtuar një qeveri gjithëpërfshirëse.
Në një fjalim të mbajtur të shtunën, al-Sharaa – udhëheqësi i grupit xhihadist Hayat Tahrir al-Sham (HTS), i cili luajti një rol kyç në rrëzimin e Asadit – e përshkroi kabinetin si një qeveri të “ndryshimit dhe ndërtimit” që pasqyron aspiratat e popullit sirian për një të ardhme më të qëndrueshme. “Me përkushtim dhe bashkëpunim, do të arrijmë synimet tona,” theksoi ai.
Ndër emërimet më të spikatura është Hind Kabawat, e vetmja grua në qeveri, një avokate e krishterë e cila do të drejtojë Ministrinë e Çështjeve Sociale dhe Punës. Yarub Badr, një alavit, është emëruar ministër i Transportit, ndërsa Amgad Badr, përfaqësues i komunitetit Druze, do të drejtojë Ministrinë e Bujqësisë.
Raed al-Saleh, më parë i lidhur me organizatën Helmetat e Bardha, është caktuar ministër i Menaxhimit të Emergjencave dhe Fatkeqësive, një ministri e sapokrijuar. Al-Sharaa ka shpallur gjithashtu krijimin e Ministrisë së Rinisë dhe Sporteve.
Ministrat e mbrojtjes dhe punëve të jashtme, Murhaf Abu Qasra dhe Asaad al-Shaibani, do të vazhdojnë të mbajnë postet e tyre. Megjithatë, qeveria e re nuk do të ketë një kryeministër, dhe në të nuk janë përfshirë anëtarë të Forcave Demokratike Siriane apo administratës autonome kurde në verilindje të Sirisë.
Qeveria e re është formuar pas ofensivës së befasishme të forcave opozitare të udhëhequra nga HTS, e cila solli rënien e qeverisë së Asadit në dhjetor. Pas rrëzimit të tij, ish-presidenti sirian u arratis në Rusi.
Megjithatë, vendi është përfshirë nga trazira të mëdha, përfshirë një kryengritje brenda komunitetit alavit, të cilët ishin mbështetës të Asadit.
Përleshjet e dhunshme midis forcave qeveritare dhe grupeve alavite kanë shkaktuar qindra viktima, duke rritur pasigurinë në vend.
