Deputeti Agron Shehaj ka njoftuar se nuk është më pjesë e Partisë Demokratike. Teksa kohët e fundit kishte rënë në heshtje sa i përket jetës politike, Shehaj ka deklaruar në Opinion se është larguar nga PD, por do të vijojë të mbetet opozitar. Shehaj ka sqaruar se PD nuk mund ti ofrojë shqiptarëve një alternativë të besueshme në gjendjen që është.
I pyetur nëse do të krijojë një parti të re, Shehaj tha se nuk ishte momenti për të folur për këtë, por nuk e mohoi dhe e la të hapur mundësinë për krijimin e një formacioni të ri politik.
“Është e vërtetë që nuk kam qenë aktiv. Nuk ka asnjë hatëmbetje. Nuk ka asnjë zënie. Unë e mendoj ndryshe. Nuk jam dakord me vendimet që janë marrë këto kohë. Ne dolëm me një rezultat nga zgjedhjet lokale ku humbën bashkitë më të mëdha. Ka një mungesë shprese dhe besimi nga ana e votuesve tanë. Ajo që unë propozoj është që ne të japim zgjidhje. Ne nuk duhet të bëjmë sikur nuk shohim. Mendoj që ne duhet t’i japim elektoratit një alternativë të besueshme. Nuk bëhet fjalë për PD-në e Bashës.
Ne duhet t’i japim elektoratit një zgjidhje. Kam folur me Berishën, por nuk më ka bindur. Unë këto shqetësime i kam ngritur. Kam që nga vera e kam ngritur këtë çështje. Duhej të afronim figura të reja, nuk duhej t’i shkonim nga pas vulës. Ne duhet t’i japim zgjidhje. Mund të ishte një parti e re. Për momentin jam deputet i opozitës, por nuk jam deputet i Partisë Demokratike. Nuk jam as pjesë e grupit të Gazmend Bardhit. Ishte ai që më përjashtoi në fillim nga grupi. Nuk jam më pjesë e PD-së. Unë parti të re? Nuk është momenti për të folur për këtë”,– tha Shehaj.
