Situata në Rripin e Gazës po përkeqësohet me ritme alarmante, ku një ndër pesë fëmijë në qytetin e Gazës po vuan nga kequshqyerja, sipas të dhënave nga Agjencia e OKB-së për Refugjatët Palestinezë.
Komisioneri i Përgjithshëm i UNRWA, Philippe Lazzarini, tha se gjendja në terren është aq e rëndë, saqë njerëzit “nuk janë as të gjallë e as të vdekur, por kufoma që ecin”.
Më shumë se 100 persona, kryesisht fëmijë, dyshohet se kanë vdekur nga uria, ndërsa rastet e kequshqyerjes po rriten në mënyrë dramatike.
Lazzarini i bëri thirrje Izraelit të hapë rrugët për ndihmat humanitare pa kufizime, ndërsa punonjësit e UNRWA-s raportojnë se po bien të fikët për shkak të mungesës së ushqimit.
Edhe Organizata Botërore e Shëndetësisë ka lëshuar një paralajmërim të fortë, duke deklaruar se popullsia e Gazës është “në proces vdekjeje nga uria”. Drejtori i përgjithshëm, Tedros Ghebreyesus, e quajti situatën “uri masive e shkaktuar nga njeriu”.
Izraeli, i cili kontrollon aksesin për ndihmat, mohon një bllokadë humanitare dhe akuzon Hamasin për kaosin dhe përvetësimin e ndihmave. Megjithatë, OKB-ja konfirmon se ndihmat janë shumë të kufizuara dhe situata nuk ka precedent në historinë e saj.
Nga ana tjetër, bisedimet për armëpushim kanë hyrë në një fazë kritike. I dërguari i posaçëm i SHBA-së, Steve Witkoff, njoftoi pezullimin e negociatave në Doha, duke fajësuar Hamasin për mungesë vullneti dhe qëndrime egoiste.
Në reagim, Hamasi ka paraqitur kërkesa të reja, përfshirë një klauzolë që ndalon rifillimin e luftës pas një armëpushimi 60-ditor dhe lirimin e 2,200 të burgosurve palestinezë – shifra më të larta se ato të ofruara nga Izraeli.
Netanyahu ka urdhëruar kthimin e negociatorëve izraelitë për konsultime, ndërsa burime të tjera pretendojnë se “momenti është ende pozitiv” dhe se negociatat mund të rifillojnë.
Ndërkohë, sulmet ajrore izraelite kanë vrarë të paktën 41 palestinezë në vetëm një ditë, përfshirë viktima në Khan Younis. Si reagim ndaj krizës humanitare, qeveria izraelite ka thirrur një takim urgjent për të diskutuar për përmirësimin e shpërndarjes së ndihmave.
Në skenën ndërkombëtare, kritikat janë shtuar. Presidenti i Francës, Emmanuel Macron, ka paralajmëruar se Franca do të njohë zyrtarisht Palestinën në shtator, ndërsa Britania po kërkon koordinim me Francën dhe Gjermaninë për ndaljen e luftës. ETUC i ka bërë thirrje BE-së të pezullojë Marrëveshjen e Asociimit me Izraelin për shkak të shkeljeve të të drejtave të njeriut.
Deklaratat e fundit të ministrit izraelit Ben-Eliyahu, i cili tha se “e gjithë Gaza do të jetë hebreje” dhe bëri krahasime me “Mein Kampf”, kanë shkaktuar zemërim të gjerë ndërkombëtar.
Ndërsa komuniteti ndërkombëtar përpiqet të ndërhyjë, popullsia civile në Gaza vazhdon të përjetojë një nga tragjeditë më të rënda humanitare të dekadave të fundit, një situatë që, nëse nuk trajtohet me urgjencë, mund të lërë pasoja të pashlyeshme në ndërgjegjen globale.
