Një gjurmë ADN-je ka qenë çelësi që zhbllokoi hetimet për grabitjen spektakolare në Muzeun e Luvrit, duke çuar në identifikimin dhe arrestimin e dy personave të shtunën në mbrëmje.
Sipas kanalit francez BFMTV, njëri nga të dyshuarit u identifikua falë një “gjurme vendimtare ADN-je” të gjetur në vendngjarje. Pas grabitjes së quajtur nga mediat “grabitja e shekullit”, policia mjeko-ligjore ishte vënë në ndjekje të çdo prove të mundshme.
Prokurorja e Parisit, Laure Beccuau, deklaroi të enjten se nga muzeu janë mbledhur mbi 150 mostra ADN-je, gjurmë gishtash dhe elementë të tjerë provues. Ndërsa shefja e policisë mjeko-ligjore, Perrine Rogiez-Thubert, sqaroi për BFMTV se ekspertët kanë punuar si me gjurmë “të pasura”, si gjak, pështymë apo spermë, ashtu edhe me gjurmë “të dobëta”, të lëna mbi objekte që grabitësit mund të kenë prekur.
Në vendngjarje janë gjetur disa sende të rëndësishme për hetimin, mes tyre një helmetë, një radio dore, një jelek i verdhë dhe dy rrota prerëse metalesh. Mostrat e marra u analizuan në laborator për të ndërtuar profilin gjenetik të autorëve të mundshëm.
Hetimi mori ritëm pasi njëri nga të dyshuarit u përpoq të arratisej. Ai u identifikua përmes ADN-së dhe u ndalua menjëherë pas testimeve. Të arrestuarit janë dy burra rreth të 30-ave, banorë të Aubervilliers, në departamentin Saint-Denis, një zonë e populluar dhe shumëkulturore në veri të Parisit.
Sipas Le Monde, njëri prej tyre mban shtetësi franceze dhe algjeriane dhe u kap në aeroportin Roissy–Charles de Gaulle ndërsa përgatitej të fluturonte drejt Algjerisë. I dyshuari tjetër është shtetas francez.
Roli i saktë i të dyve në grabitje ende nuk është përcaktuar, por ata konsiderohen si të dyshuarit kryesorë. Policia franceze po vijon hetimet për të identifikuar bashkëpunëtorët e tjerë dhe për të gjetur plaçkën e grabitur, e cila mbetet ende e zhdukur.
