Arlind Gjokutaj së bashku me 2 bashkëpuntorët, të cilët akuzohen se kanë shpërdoruar detyrën dhe i kanë shkaktuar shtetit një dëm prej 1.2 mln euro janë lënë në burg nga Gjykata e Tiranës.
Arlind Gjokutaj, i cili mbante detyrën e Sekretarit të përgjithshëm të Ministrisë së Financave nuk u paraqit në seancë, pasi sipas sqarimit të avokatëve ai ka shfaqur probleme kardiake në izolim, dhe për pasojë është transportuar në spital.
Seanca përfundoi rreth orës 13:00, ndërsa ndaj Gjokutajt u dha masa pa prezencë por me prokurë të posaçme të tij dhe u përfaqësua nga avokatët.
Në seancë kanë qenë të pranishëm vetëm drejtori i personelit në Ministrinë e Financave, dhe Alban Ruli, përmbarues.
Bazuar në të dhënat e prokurorisë 3 shtetasit e akuzuar, dyshohet se kanë vepruar duke pranuar shpërblimin e shtetasit Ilir Thana, në vlerën e rreth 82.000.000 lekëve, nga të cilat 50.000.000 lekë të kaluara në llogarinë e këtij shtetasi duke e trajtuar si pronar pa qenë në këtë status si dhe duke ekzekutuar për herë të dytë një vendim gjyqësor të ekzekutuar nga Ministria e Financave në vitin 2015.
Ky rast pasoi skandalin e mëparshëm ku një pastruesi arriti të grabiste 500 mijë euro, kjo sipas deklaratës së saj në polici, në shtëpinë e një zyrtareje të lartë, burimi i të cilave nuk është i qartë.
