Mbrëmjen e djeshme Shkodra u trondit nga një atentat ku mbeti i vrarë 19-vjeçari, Erion Xhenja. Xhenja u vra me armë zjarri në një lokal pranë Bulevardit “Bujar Bishanaku”. I riu u qëllua me 5 plumba, të cilët rezultuan fatal, duke i marrë jetën në vend, ndërsa autorët nuk janë kapur akoma.
Ndërkohë ka ardhur një reagim nga një i afërm i viktimës, i cili i revoltuar pyet se si mund të vritet një 19-vjeçar, vetëm sepse punonte në fermën e disa personave me të shkuar kriminale.
Duke iu referuar raportimeve në media se i riu punonte në një nga fermat e personave me precedent penal, ai thotë se Erjoni vjen nga një familje e thjeshtë dhe se asgjë nuk justifikon vrasjen e 19-vjeçarit.
“I riu i vrarë sot është djali i vajzës së tezes time. Vjen nga një familje e thjeshtë, e ëma mësuese, i ati ka punuar si shofer, është marrë me rritje bletësh dhe punë të ndryshme për të mbajtur familjen me djersë dhe me nder.
Njerëz të qetë, të urtë e fjalë mirë. Sot marr vesh se i Erjoni paska punuar në një nga fermat e personave me precedent penale?! A është kjo arsye të vritet një 19-vjeçar?!”, shkruan i afërmi i viktimës së atenatit të mbrëmshëm, Erjon Xhenja.
