Tomorr Brahushi, një 44-vjeçar nga Lushnja, i bën apel shtetit dhe donatorëve të ndryshëm, ta ndihmojnë në mënyrë që t’i nënshtrohet operacionit për ndërrimin e gjinisë. Ai ka shprehur publikisht dëshirën që të bëhet femër.
Brahushi, jetim, por që u birësua në Shtëpinë e Fëmijës së Vlorës vite më parë, jeton i vetëm në kushte të mjera në një ndërtesë në Lushnjë, pasi tashmë edhe prindërit birësues janë ndarë nga jeta.
Prej vitit 2007 ai jeton në terr pasi nuk ka lekë të paguajë energjinë elektrike. Thotë se jeton duke kërkuar lëmoshë, ndërsa fqinjët i janë gjendur gjithmonë pranë duke i dhënë për të ngrënë.
E pavarësisht të gjithave vështirësive, e paragjykimeve, ai zgjedh ta thotë publikisht dëshirën e tij: Dëshiron të jetojë si grua dhe të bëjë ndërhyrje kirurgjikale për të ndërruar gjini. Frika e tij është që njerëzit ta vënë në lojë dhe ta përbuzin, por kjo nuk e ka penguar të thotë hapur, se do të donte të jetonte si grua.
Të qenit mashkull, thotë se i shkakton stres dhe se e ka të nevojshme të marrë hormone femërore.
Brahushi i ndodhur në pamundësi financiare, i bën apel shtetit, dhe cilitdo personi që mund të kthejë sytë nga ai, ta ndihmojnë me fonde për të ndryshuar gjininë.
Ndërkohë kujtojmë se operacione të tilla kirurgjikale janë mjaft të kushtueshme.
