Ditën e sotme është zhvilluar seanca gjyqësore për 31 të arrestuarit e “Mezhgoranit”.
Mësohet se Prokuroria e Përmetit ka kërkuar ‘arrest me burg’ për të gjithë të arrestuarit burra, mes të cilëve edhe gazetari Henri Çili.
Ndërsa për dy gratë e përfshira në këtë çështje, Shpresa Gjocaj dhe Kejsi Meçon, është dhënë masa e sigurisë “arrest shtëpie”.
Ndërkohë, për Betim Shkupin nuk ka ende një qëndrim, pasi do të gjykohet nga një gjyqtar tjetër, sepse kishte konflikt interesi me gjyqtarin pasi kishin qenë shokë klase.
Kujtojmë se Henri Cili akuzohet nga prokuroria e Gjirokastrës për ndërhyrjen te funksionarët e lartë publikë për lirimin nga burgu të dy vëllezërve Aliko, akuzuar për vrasjen e efektivit të policisë Ibrahim Basha, gjatë ndërhyrjes së policisë së shtetit në Lazarat.
Të arrestuarit akuzohen për vepra të ndryshme penale, si: “Prodhimi dhe shitja e narkotikëve”, “Ushtrimi i ndikimit të paligjshëm ndaj personave që ushtrojnë funksione publike”, ‘’Falsifikimi i dokumenteve dhe kartëmonedhave”, “Mbajtja pa leje e armëve të zjarrit dhe lëndëve plasëse”, “Organizimi i lotarive të palejuara”, “Pastrimi i produkteve të veprës penale apo veprimtarisë kriminale”, “Fshehja e të ardhurave”, “Mashtrimi”, Moskallëzimi i krimit”, “Përkrahja e autorit të krimit” dhe “Shpërdorim detyre”.
