Edhe këtë vit, testi i anglishtes për maturantët është shpërndarë në rrjetet sociale vetëm pak minuta pas fillimit të provimit.
Portali “Studentët denoncojnë” publikoi në Instagram variantin B të testit, ndërsa provimi vijon deri në orën 12:30.
Sot, rreth 27 mijë maturantë po zhvillojnë provimin e parë të Maturës Shtetërore, atë të Gjuhës së Huaj, ndërsa provimet e tjera do të zhvillohen gjatë muajit qershor.
Gjuhë Shqipe dhe Letërsi janë planifikuar për më 10 qershor, Matematika më 17 qershor dhe Provimi me Zgjedhje më 24 qershor.
Testi përbëhet nga 60 pyetje me alternativa dhe pyetje me zhvillim, të cilat maturantët duhet t’i përfundojnë brenda 2 orësh e 30 minutash.
Për 140 maturantë me nevoja të veçanta janë parashikuar teste të personalizuara.
Skema e publikimit të tezave në rrjetet sociale është bërë problematikë për disa vite me radhë, duke sfiduar transparencën e provimeve.
Megjithatë, kalendari i provimeve do të vijojë sipas planit të paracaktuar.
