Një ngjarje e rëndë ka ndodhur tre ditë më parë në fshatin Gjoricë e Poshtme të Bulqizës.
Kjo ngjarje është bërë sot publike, e ndërsa ende nuk është bërë asnjë njoftim nga policia lidhur me ngjarjen.
Disa persona të maskuar dhe të armatosur kanë hyrë në një lokal të fshatit dhe kanë dhunuar brutalisht një 25-vjeçar.
Brenda në lokal ndodheshin rreth 20 persona.
Ngjarja është bërë publike nga një banor i cili është edhe anëtar i pleqësisë në fshat.
Gëzim Miftari thotë se mes personave që panë terror ka qenë edhe djali i tij në lokal.
Ai ka treguar se ishin 4 persona të maskuar me automatik dhe pistoleta, që ishin futur të maskuar në lokal.
Njëri prej tyre ruante në derën e lokalit, e ndërsa tre të tjerët u kishin kërkuar personave që ishin brenda biznesit që të uleshin në tokë ose ndryshe do qëllonin me armë ndaj tyre.
Miftari rrëfen se kanë nisur të dhunojnë të riun me inicialet F.A., duke e goditur me qytën e armës.
Pasi e kanë dhunuar, ata janë larguar ndërsa personat e gjendur aty kanë transportuar të riun në spitalin e Dibrës në gjendje të rëndë shëndetësore.
“Kam qenë ndoshta jo prezent, por kam qen pas 10 minutash, pasi isha afër.
Brenda në lokal ishte djali im. Ngjarja e rëndë, s’ka ndodhur asnjëherë në fshatin tonë.
kanë ardhur 3-4 persona, të armatosur dhe me maska dhe kanë hyrë në lokal.
Ka qenë rreth orës 21:30 e darkës.
Ata u thanë që të shtriheshin përtokë.
Njëri prej tyre e masakruan një djalë duke pirë kafe.
Sot ai djali është në spital, në gjendje kritike për jetën.
Ndodhet në spitalin e Peshkopisë.
Unë i bëj thirrje Edi Ramës, do i dërgoj një mesazh, atij dhe ministrit të Drejtësisë, prokurorit të Përgjithshëm, presidentit të Republikës, që të marrin masat, pasi do armatosemi të gjithë si fshat, dhe nuk do kërkojmë më ndihmën e tyre.
S’do lejojmë as policinë e shtetit, asnjë tjetër.
Nëse donte policia e shtetit, mund ta kishte zbardhur.
Ne do të armatosemi të gjithë dhe kur të vijë policia e shtetit, do t’i vrasim të parët. Unë futem në burg, 10 vite, 100 vite.
Unë them se policia e shtetit i di këto gjëra. ne kemi humbur besimin tek shteti”,- tha Miftari.
