Nesër nis zyrtarisht viti i ri shkollor 2025–2026 në të gjithë vendin, ku pritet që rreth 345 mijë nxënës të ulen në bankat e shkollës. Ministria e Arsimit njoftoi përmes një postimi në rrjetet sociale se procesi mësimor do të mbështetet nga 31 mijë mësues. Një risi për këtë vit është shtimi i mbështetjes për nxënësit me aftësi të kufizuara, ku janë angazhuar 2,260 mësues ndihmës, 150 më shumë se një vit më parë.
Megjithatë, situata paraqitet ndryshe në Korçë, ku është shënuar një rënie e ndjeshme e numrit të nxënësve. Krahasuar me vitin e kaluar, janë 3,726 nxënës më pak, duke e ulur shifrën nga 21,080 në 17,354. Si pasojë, disa shkolla janë bashkuar, ndërsa dhjetëra klasa të para nuk janë hapur, pasi nuk ka pasur asnjë regjistrim.
Nënkryetari i sindikatës së mësuesve në Korçë e ka cilësuar këtë reduktim me gati një të katërtën e nxënësve si një tregues alarmant, që kërkon ndërhyrje urgjente në sistemin arsimor. Rënia e numrit të fëmijëve ka ndikuar edhe tek stafi pedagogjik, ku shumë mësues kanë mbetur pa ngarkesë të plotë mësimore. Një pjesë e tyre pritet të sistemohen si mësues ndihmës ose të angazhohen në programe pas-shkollore.
