Ditën e sotme, kryeministri i vendit Edi Rama ka reagur sërish lidhur me tensionet ne veri të Kosovës dhe faktin që 3 policicet e rrëmbyer akoma po mbahen peng ne Serbi.
Me anë të një statusi në rrjetet sociale, Rama theksoi se Kurti duhet të dalë nga guaska e vetëizolimit, ndërsa i bën thirrje që mos të humbasë veriun.
Po ashtu Rama paralajmëron Serbinë duke deklaruar se nëse 3 efektivët e policisë së Kosovës nuk lirohen kjo do të jetë java e rikthimit të akullit midis vendeve.
REAGIMI
Sa më shumë mbahen në Serbi këta tre burra që edhe sikur ta kenë shkelur vijën e kufirit s’kanë kryer asnjë krim, aq më pak do jetë e mundur që marrëdhëniet tona bilaterale të mos bëjnë shumë hapa mbrapa! Kjo do jetë java e rikthimit të akullit mes nesh nëse ata nuk lirohen!
Nga ana tjetër nëse de-eskalimi nuk ndodh e humbura e madhe do të jetë Kosova – sepse Serbia mbase nuk jeton dot pa u ri-izoluar! Druaj shumë se sa më shumë Albini këmbëngul në të tijën kundër aleatëve, aq më shumë situata mund të agravohet, duke rikthyer KFOR-in në krye të punës!
E atëherë lamtumirë për kushedi sa kohë edhe kontrollit formal të shtetit mbi krejt territorin dhe ta gëzojmë një Republikë të KFOR-it në Veriun e Kosovës! Albin dil nga guaska e vetizolimit dhe mos e humb Veriun duke parë kudo armiq e tradhtarë! Koha është tani dhe po fluturon!
