Drejtoria e Përgjithshme e Shërbimeve të Transportit Rrugor ka rikujtuar se mjetet që kanë detyrime të papaguara për taksën vjetore të përdorimit dhe taksën e luksit nuk do të përfitojnë asnjë shërbim deri në shlyerjen e plotë të borxhit.
Sipas të dhënave zyrtare, në shkallë vendi rezultojnë 256,741 mjete debitore, nga të cilat 84% i përkasin individëve dhe 16% bizneseve.
Borxhi total i akumuluar për këto taksa arrin në rreth 17 miliardë lekë (afro 170 milionë dollarë), me detyrime që datojnë që nga viti 2012 deri në qershor 2025.
Në krye të listës qëndron Qarku i Tiranës, me 100,453 mjete debitore (39% e totalit), ndjekur nga Durrësi me 35,153 mjete dhe Shkodra me 17,881 mjete me detyrime të pashlyera.
Për mbledhjen e këtyre borxheve, DPSHTRR ka ndërmarrë një plan masash që përfshin:
• Njoftime shkresore mujore nga Drejtoritë Rajonale;
• Njoftime digjitale përmes portalit e-Albania për përfundimin e afatit të taksës;
• Verifikime në terren përmes sistemit të monitorimit elektronik;
• Refuzim i shërbimeve për mjetet që rezultojnë debitore.
Në rast mospagimi, DPSHTRR thekson se do të bllokojë ofrimin e shërbimeve të mëposhtme për mjetet debitore:
• Ndryshimi i pronësisë dhe i targave;
• Kontrolli fizik për xhamat e errësuar;
• Pajisja me Leje Qarkullimi kombëtare apo ndërkombëtare;
• Kryerja e kontrollit teknik;
• Çregjistrimi i mjetit;
• Pajisja me certifikata ADR dhe CEMT;
• Çdo lloj konfirmimi zyrtar për mjetin.
Autoriteti apelon qytetarët dhe subjektet që të verifikojnë detyrimet në sistem dhe të kryejnë pagesat sa më parë, për të shmangur ndërprerjen e shërbimeve dhe pasoja të mëtejshme administrative.
