Një 25-vjeçar shqiptar është gjetur i pajetë pasditen e së premtes në Itali, në një zonë rurale në Santa Vittoria d’Alba, në provincën e Cuneos. I riu dyshohet se është qëlluar me plumb në kokë, ndërsa trupi i tij ishte mbuluar pjesërisht me rërë.
Sipas mediave italiane, viktima banonte në Santa Vittoria d’Alba dhe u gjet në një parcelë toke në anë të rrugës Chivola. Pranë trupit ndodhej një automjet tip “Lancia Ypsilon” me ngjyrë të zezë, që dyshohet të ketë qenë në pronësi të tij.
Mediat raportojnë se trupi u zbulua nga një drejtues mjeti që po kalonte rastësisht në zonë. Ai ka njoftuar menjëherë policinë pas konstatimit të ngjarjes.
Autoritetet italiane nuk kanë dhënë ende një konfirmim zyrtar për shkaqet e vdekjes, por dyshimet paraprake flasin për një vrasje me armë zjarri. Arma nuk është gjetur në vendngjarje, ndërsa fakti që trupi ishte mbuluar pjesërisht me rërë shton dyshimet për një krim.
Hetimet po zhvillohen nga karabinierët e kompanisë së qytetit dhe nga njësia hetimore e komandës provinciale të Cuneos, nën koordinimin e prokurores publike Sara Paterno të Zyrës së Prokurorit të Asti-t. Autoritetet po punojnë për të zbardhur rrethanat e plota të ngjarjes.
