Përgjatë vitit që lamë pas 17 zyrtarë të niveleve të ndryshme janë vënë në shënjestrën e ligjit të dekriminalizimit.
Nga verifikimit i 163 zyrtarëve, 17 subjekte kanë rezultuar në kushtet e ndalimit të ushtrimit të funksionit, për shkak të parashikimeve të ligjit të dekriminalizimit, raporton Report Tv.
Identitetet e tyre nuk janë zbuluar ende, por raportohet se 2 zyrtarë janë të nivelit të lartë, 6 janë të nivelit ekzekutiv, 6 të tjerë të nivelit drejtues dhe 3 subjekte të nivelit të mesëm.
Ata janë zbuluar pas verifikimeve të kryera nga njësia e dekriminalizimit pranë Prokurorisë së Përgjithshme, në bazë të kërkesave të institucioneve publike dhe janë kallëzuar më pas penalisht për ‘falsifikim dokumentesh’, pasi kanë fshehur të dhënat rreth së shkuarës së tyre në formularët e dekriminalizimit.
Departamenti Administratës Publike ka referuar në njësinë e dekriminalizimit 71 kërkesa për verifikim të zyrtarëve, Këshilli i Emërimeve në Drejtësi ka bërë 40 kërkesa, Kuvendi 21 kërkesa, Këshilli i Lartë Gjyqësor 50 kërkesa, Komisioni Qendror i Zgjedhjeve 9 kërkesa, Gjykata e Lartë 8 kërkesa dhe individët kanë bërë 5 kërkesa.
Nga 204 kërkesa, janë shqyrtuar vetëm 163, ndërsa të tjerat janë mbartur për vitin 2020, ku vetëm në muajin e parë të vitit janë regjistruar 21 kërkesa për verifikimin e zyrtarëve të niveleve të ndryshme nëse janë apo jo në kushtet e ndalimit të ushtrimit të funksionit.
Shtatë kërkesa janë bërë nga Departamenti Administratës Publike, 9 kërkesa nga Këshilli i Emërimeve në Drejtësi, 1 kërkesë nga Komisioni i Pavarur i Kualifikimit, 1 kërkesë nga KQZ, 1 kërkesë nga Lëvizja Qytetare Sopoti dhe 2 kërkesa nga Partia Demokratike.
