Një ngjarje tragjike ka ndodhur në Korçë, ku një 12-vjeçar nga fshati Pocestë i bashkisë Maliq ka humbur jetën pas komplikacioneve të rënda kardiake, pas një periudhe trajtimi në spital.
Djali, i cili ishte nxënës i klasës së 7-të në shkollën 9-vjeçare të Vashtës, u transportua fillimisht në Spitalin Rajonal të Korçës për shkak të një gjendje shëndetësore të rënduar.
Më pas, për shkak të përkeqësimit të shpejtë të situatës, ai u dërgua urgjent në Qendrën Spitalore Universitare “Nënë Tereza” në Tiranë, ku humbi jetën.
Familjarët e 12-vjeçarit tregojnë se në fund të dhjetorit ai kishte shkuar në spitalin e Korçës me simptoma gripale, duke shfaqur të vjella dhe temperaturë të lartë, ku u trajtua në reanimacion.
Pas përkeqësimit të gjendjes, dje u transportua me urgjencë në Tiranë dhe u shtrua në pavionin e Covid-it, pavarësisht se familjarët kishin kërkuar që të ndiqej në reanimacion.
Ata thonë se, kur djali filloi të ketë të vjella të pandërprera, e njoftuan infermieren, por ajo u përgjigj se “nuk ka mundësi”.
Sipas tyre, djali nuk u trajtua siç duhej dhe, në një moment, ai shfaqi dhimbje të forta në gjoks. Ata e morën në krahë për ta çuar në urgjencën e pediatrisë, por ai humbi jetën gjatë rrugës.
Sipas mjekëve, shkaku i vdekjes ishte arresti kardiak. Familjarët janë të tronditur dhe shprehin dyshime se një virozë mund të ketë sjellë këtë fund tragjik, duke theksuar se djali nuk kishte vuajtur më parë nga probleme kardiake apo diabet.
Megjithatë, gjatë ditëve të fundit, niveli i sheqerit në gjak i ishte rritur deri në 200.
Policia po heton për zbardhjen e rrethanave të ngjarjes, ndërsa familjarët nuk kanë pranuar të kryhet ekspertiza mjekoligjore. Ata kërkojnë që dhimbja e tyre të respektohet dhe që çështja të mos vazhdojë më tej.
