Skandali i 119 kg kokainë që u sekuestruan në kontejnerin e firmës së bananeve “ZICO Sh.a” e “Bana King”, e ka çuar në 5 numrin e të arrestuarve. Mësohet se gjatë mbrëmjes së sotme, policia ka arrestuar një agjent të AKU-së dhe një agjent doganor në Durrës. Dyshohet se në ngarkesën ku kishte kokainë të fshehur në banane, të arrestuarit e ditës së sotme, kanë firmosur shkresën për ngarkesën me fruta ekzotike. Pritet që policia të arrestojë edhe tre nëpunës të Portit të Durrësit. Kujtojmë se pas kokainës së konstatuar në një nga magazinat e kompanisë së bananeve në Vaqarr, u prangosën 3 persona, Marson murataj, Gëzim Kalaja, Hasan Saliu.
Murataj një nga të ‘piketuarit’ e rastit konkret, figuron si administrator i firmës, por në të vërtet ai është krye-menaxher i pritjes së kontejnerëve në Durrës, transportit të tyre në magazina dhe shpërndarjen e bananeve tek konsumatori. Lajmi në fakt ka marrë ‘dhenë’, ndërsa për sekuestrimin e kokainës e fshehur ‘mirë e bukur’ në banane, nuk ka pasur një reagim zyrtar nga ana e ministrit të brendshëm, Bledi Çuçi, drejtorit të policisë, Gledis Nano, dhe as nga ana e drejtorit të Portit të Durrësit, Pirro Vengu.
Nga gjithë ky sekuestrim i kësaj sasie të madhe droge, ajo që mbetet mister është fakti se si skaneri nuk e ka konstatuar drogën, ndonëse në kamion ishin 100 pako kokainë, por që burime deklarojnë se në kontejner ka pasur 1925 kg kokainë, ndërsa disa nga këto pako janë hequr më përpara.
