Varësia ndaj internetit dhe rrjeteve sociale po kthehet në një shqetësim serioz për shëndetin mendor të fëmijëve dhe adoleshentëve në mbarë botën. Sipas Organizatës Botërore të Shëndetësisë, 1 në 10 adoleshentë vuan nga varësia ndaj internetit, një tendencë që ka nisur të reflektohet qartë edhe në Shqipëri.
Të dhënat e mbledhura nga Instituti i Shëndetit Publik tregojnë se përdorimi i rrjeteve sociale është mënyra kryesore e komunikimit mes fëmijëve të moshës 12 deri në 15 vjeç.
“Gati 30% e fëmijëve që kemi pyetur në moshat 12-15 vjeç kanë thënë se gjatë gjithë kohës mbajnë komunikim nëpërmjet internetit me njëri-tjetrin”, deklaroi Andia Meksi, specialiste pranë ISHP.
Megjithatë, varësia ndaj teknologjisë sjell pasoja serioze në zhvillimin psikologjik dhe emocional të të rinjve. Specialistët evidentojnë rritjen e niveleve të ankthit, nervozizmit dhe çrregullimeve të perceptimit të trupit, që shpesh janë të ndikuara nga imazhet jo reale të para në rrjete sociale.
“Bëhen nervoz edhe kur nuk janë në rrjetet sociale. Çrregullimi dismorfik, ose imazhi jo real për trupin mund t’i çojë në një sërë problemesh psikologjike, emocionale por mbi të gjitha në sjellje”, shtoi Meksi.
Teknologjia, sipas ekspertëve, mund të ketë ndikim pozitiv vetëm nëse përdoret në mënyrë të kontrolluar dhe të ndërgjegjshme. Për këtë arsye, ata i bëjnë thirrje prindërve të monitorojnë më nga afër aktivitetin online të fëmijëve të tyre.
“Duhet që prindërit të jenë të kujdesshëm për të monitoruar faqet ku fëmijët e tyre ekspozohen, me kë komunikojnë dhe çfarë shikojnë”, theksoi specialistja.
Varësia nga interneti nuk prek vetëm të rinjtë. Edhe të rriturit po tregojnë shenja të ngjashme, ndaj këshillohet që të gjithë të bëjnë një “detox dixhital” — të shkëputen për disa orë nga pajisjet elektronike çdo ditë për të ruajtur mirëqenien mendore dhe emocionale.
