TIRANË
OFL këtë herë ka ndaluar në Vlorë, teksa iu ka dërguar në qytetin jugor bregdetar, formular për deklarim të pasurisë, 4 shtetasve.
Operacioni Forca e Ligjit ka vënë në sitë 4 persona, të gjithë të dënuar për trafik të lëndëve narkotike.
Këta persona do të plotësojnë formularin e deklarimit të pasurisë për 2 javë, ndërsa përgjigjet do i çohen SPAK-ut, që do të ndërmarrë ose jo veprime të mëtejshme ndaj deklaruesve.
OFL vijon procesin e saj përditë, duke dërguar formular për deklarimin e pasurisë tek shtetas të dënuar për krime të rënda, të dyshuar se e kanë vendosur pasurinë në mënyra kriminale.
Njoftimi i OFL-së:
Operacioni Forca e Ligjit vijon pa ndërprerë në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
- Julian Toro, banues në Vlorë, i dënuar për veprën penale “Prodhimi dhe shitja e narkotikëve”;
- Viktor Shoraj (alias Robert Toro), banues në Vlorë, i dënuar në Itali për veprën penale “Trafikimi i narkotikëve”;
- Dino Abazi, banues në Vlorë, i dënuar për veprën penale “Mbajtja e substancave narkotike”;
- Daniel Nikaj, banues në Vlorë, i dënuar për veprën penale “Kultivimi i bimëve narkotike”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
