Pas dorëheqjes së Ermal Onuzit nga posti i Drejtorit të Përgjithshëm të Gardës së Republikës, Ministri i Brendshëm ka caktuar në këtë detyrë Simon Zerecin, i cili mban gradën Drejtues i Lartë.
Deri tani, Zereci ushtronte funksionin e Zëvendësdrejtorit të Përgjithshëm të Gardës.
Kush është Simon Zereci?
Simon Zereci është një ushtarak me karrierë të gjatë dhe të konsoliduar në fushën e sigurisë. Ai ka përfunduar shkollën e mesme ushtarake “Skënderbej” dhe më pas ka ndjekur studimet në Shkollën e Lartë të Bashkuar të Oficerëve, në specialitetin “Gjithëarmësh”.
Shërbimin ushtarak e ka nisur në vitin 1986, fillimisht në Ministrinë e Mbrojtjes, ndërsa vetëm dy vite më vonë iu bashkua Gardës së Republikës, ku ka kaluar pothuajse të gjitha hallkat e komandimit, nga Komandant Toge, tek Specialist për sigurinë fizike të personaliteteve, Komandant Grupi, Oficer Shoqërues, deri te Zëvendëskomandant dhe Komandant Njësie Speciale.
Një moment kyç në karrierën e tij është shtatori i vitit 1998, kur Zereci u plagos në krye të detyrës, gjatë trazirave politike të asaj kohe.
Ai ka ndjekur trajnime dhe kualifikime të shumta brenda dhe jashtë vendit, përfshirë:
• Trajnim për mbrojtjen e personaliteteve në Egjipt
• Program sigurie me instruktorë amerikanë
• Trajnim në teknikat e vetëmbrojtjes “Krav Maga Maor”
• Kurset për siguri të avancuar të zhvilluara nga partnerë ndërkombëtarë
Në vitin 2020, Zereci mori gradën Kolonel, e cila më pas u konvertua në Drejtues i Parë, sipas skemës së re të gradave në Policinë e Shtetit.
Me ngritjen në detyrën e Zëvendësdrejtorit të Përgjithshëm të Gardës, ai u gradua Drejtues i Lartë, ndërsa tani merr komandën e plotë të kësaj strukture elitare të sigurisë shtetërore.
Emërimi i tij vjen në një kohë kur Garda e Republikës kërkon profesionalizëm të lartë dhe përvojë të provuar për të përballuar sfidat e sigurisë që lidhen me mbrojtjen e institucioneve dhe personaliteteve të larta të shtetit.
