Ish-kryetari i Bashkisë së Kavajës, Elvis Rroshi, është marrë zyrtarisht i pandehur nga Prokuroria e Posaçme Kundër Korrupsionit dhe Krimit të Organizuar (SPAK), me akuzën e shpërdorimit të detyrës, në bazë të nenit 248 të Kodit Penal.
Të hënën, Roshi është paraqitur në ambientet e SPAK-ut, ku në prani të avokatit të tij, Andi Skënderi, i është komunikuar zyrtarisht statusi si i pandehur në këtë çështje penale. Procedimi penal kundër tij nisi pas një kallëzimi të bërë nga Këshilli i Lartë i Shtetit (KLSH), i cili gjatë një auditimi për periudhën 2013–2014, kur Roshi drejtonte bashkinë, evidentoi një sërë shkeljesh në sektorin e urbanistikës dhe në procedurat e prokurimit publik.
Sipas raportit të KLSH-së, këto parregullsi kanë shkaktuar një dëm ekonomik në buxhetin e shtetit në vlerën e rreth 33 milionë lekëve. Tenderat për rikonstruksionin e qendrës së qytetit dhe ndërtimin e disa rrugëve, sipas SPAK, janë trajtuar me shkelje të rënda të ligjit, përfshirë edhe mangësi në dokumentacion dhe mungesë konkurrimi real.
Ndaj Rroshit janë zhvilluar disa seanca dëgjimore pranë SPAK, në kuadër të hetimeve që kanë përfshirë edhe dhjetë zyrtarë të tjerë të Bashkisë së Kavajës të asaj periudhe.
Kjo nuk është hera e parë që emri i Elvis Rroshit del në qendër të hetimeve. Më 18 maj 2025, në kuadër të një tjetër hetimi të nisur për krime zgjedhore, atij iu sekuestrua telefoni celular, si dhe një sërë dokumentesh, përfshirë fatura, kupona karburanti dhe lista zgjedhësish, të gjetura në ambientet që ai përdorte. Operacioni përfshiu kontrolle në disa banesa dhe hetimi vijon ndaj pesë personave të dyshuar për manipulim të procesit zgjedhor.
Ndërkohë, më parë, Gjykata e Durrësit kishte vendosur të pushonte një tjetër çështje penale ndaj Rroshit, që kishte të bënte me akuza të ngjashme. Por dosja e re e SPAK, e mbështetur në gjetjet e KLSH, ka çuar në hapjen e një procesi të ri penal dhe në marrjen e tij zyrtarisht si i pandehur.
