Ditën e djeshme një vrasje tronditi Kavajën, teksa autori Habib Rexha është në arrati dhe ende nuk ka asnjë gjurmë prej tij. Habib Rexha ekzekutoi pasditen e djeshme me një plumb në kokë 48-vjeçarin Arjan Gosa, i cili ishte duke pirë kafe me babanë e tij në një lokal në Kavajë. Mësohet se arma është shkrepur me dorën e majtë pasi autori dorën e djathtë e ka të dëmtuar. Ai ka vepruar i vetëm dhe pas vrasjes ka arritur që të largohet në këmbë, ndërsa policia ka publikuar edhe foton e tij dhe kërkon nga qytetarët informacione që mund të çojnë në gjurmët e tij.
Ndërkohë që për kapjen e tij Policia “josh” qytetarët që të raportojnë duke iu premtuar 10 mijë euro, nëse informacioni i saktë çon në arrestimin e tij.
Vlen të theksojmë se shkak i vrasjes është hakmarrja, pasi Habib Rexha është vëllai i Altin Rexhës, i cili mbeti i vrarë në vrasjen e dyfishtë në muajin mars të këtij viti në Kavajë, ku viktimë mbeti edhe Edmond Gosa.
Nga të dhënat që janë publikuar deri më tani duket se Habib Rexha mori hakun e të vëllait, për një vrasje të dyfishtë në muajin mars që nisi për një konflikt banal. Autori veproi i vetëm, e duket se është përpjekur që shenjën e hakmarrjes t’ia kthejë në të njëjtën mënyrë fisit Gosa. Ashtu sikurse Arjani u ekzekutua në sy të të atit, edhe Altin Rexha kishte pasur të birin përdore kur Edmond Gosa e la të vdekur.
