Një kallashnikov është gjetur në një makinë të djegur këtë mëngjes në Sukth të Durrësit, pak kilometra larg vendit kur persona të panjohur ekzekutuan Edmon Koçin i njohur si Mond Çekiçi.
Dyshimet janë se arma dhe makina në fjalë janë përdorur nga vrasësit për t’i marrë jetën Çekiçit në një pritë të organizuar pranë Drejtorisë Arsimore në Durrës në orën 8:40.
Në foto duken qartë gjurmët e plumbave mbi xhamin e pasagjerit, ku ishte i ulur dhe viktima.
Lidhur me ekzekutimin, Policia e Durrësit ka shoqëruar rreth 20 persona.
Si ndodhi ngjarja?
Ngjarja e rëndë ka ndodhur rreth orës 08:40 të mëngjesit, ndërkohë që policia ka ngritur pika kontrolli në të gjitha akset rrugore në hyrje e në dalje të Durrësit si dhe në drejtim të Tiranës e Kavajës.
Mond Çekiçi, 40 vjeç u ekzekutua me breshëri plumbash në makinën e tij dhe me të ka qenë edhe shoferi i tij i cili po jep dëshminë e tij në polici.
Mësohet se një automjet tjetër u ka prerë rrugën, dhe shoferi i Edmondit doli për të pyetur se çfarë ka , ndërkohë që një nga personat në mjetin tjetër e ka qëlluar për vdekje Edmondin duke zbrazur dy karikatorë plumbash dhe janë larguar me një mjet tip Benz me targa të vjedhura në Tiranë i cili më vonë u gjet i djegur në Katund Sukth, Durrës.
Kush është Edmond Koçi?
I njohur edhe si “Mond Çekiçi”, ai konsiderohej nga policia e Durrësit si person me rrezikshmëri, pasi jo vetëm që ishte pjesë përbërëse e një klani kriminal në Durrës, por ai rezultonte të ishte dënuar disa herë për akuzën e mbajtjes pa lejë të armëve dhe kundërshtimit të forcave të policisë.
Në muajin maj 2009 Edmond Koçi, u dënua me 2 vite burgim për akuzën e “Mbajtjes pa lejë të armëve”.
Në një raport të ministrisë së Brendshme të botuar në vitin 2016, thuhej se “Mond Çekiçi”, është pjesë shoqërore me Lulzim Berisha “Luli”, Emiljano Shullazi “Mili”, Plarent Dervishaj “Lenti”, Marjel Fierza, Julian Meçaj, Bashkim Haxhiaj dhe persona të tjerë.
