Pas përfundimit të hetimeve dhe komunikimit të akuzës në fund të vitit të kaluar, dosja penale ndaj portugezit Ruben Saraiva, i akuzuar për vrasjen e biznesmenit Ardian Nikulaj, është dërguar për gjykim në Gjykatën e Lezhës.
Dosja e Saraiva është veçuar nga ajo e pesë personave të tjerë, të cilët ende nuk janë ekstraduar nga Britania e Madhe.
Çështja do të shqyrtohet nga gjyqtari Renis Sheshi, dhe seanca e parë paraprake është caktuar për më 26 shkurt.
Ndaj 30-vjeçarit portugez, prokuroria e Lezhës ka ngritur akuzat për “Vrasje për gjakmarrje” e kryer në bashkëpunim dhe “Armëmbajtje pa leje”, ndërsa gjykata do të vendosë nëse çështja do të kalojë në gjykim themelor ose do të kthehet për hetime shtesë.
Ruben Saraiva u ekstradua në Shqipëri më 31 dhjetor 2023, pas një vendimi të Gjykatës së Marokut, dhe ka qëndruar në paraburgim në Tiranë. Ai është i lidhur me vrasjen e Nikulaj në Shëngjin, më 19 prill 2023.
Për këtë krim, të akuzuar janë edhe katër shtetas britanikë që ndihmuan, si dhe Edmond Haxhia, i dyshuari si organizator dhe porositës i vrasjes.
Vrasja e Nikulaj është pjesë e një konflikti të gjatë hakmarrjeje me familjen Lekstakaj.
