Ditën e sotme një 47-vjeçar shqiptar është ekstraduar nga Greqia drejt Shqipërisë. Erdion Shahaj është dënuar nga drejësia shqiptare me 8 vite burg, pasi akuzohet për vjedhje me dhunë.
Shqiptari ishte arrestuar që në vitin 2018 nga autoritetet në Athinë, e ndërsa ditën e sotme është kryer edhe ekstradimi pas kërkesës së autoriteteve shqiptare për të vuajtur dënimin në vendin tonë.
Njoftimi i policisë:
Interpol Tirana ekstradon nga Greqia një shtetas të dënuar me 8 vite burg për vjedhje me dhunë.
Nga Specialistët e Interpol Tirana është bërë ekstradimi nga Greqia drejt Shqipërisë, i shtetasit shqiptar: Erdion Shahaj, 47 vjeç.
Shtetasi i lartëpërmendur është arrestuar nga autoritetet policore në Athinë në Dhjetor të vitit 2018 me qëllim ekstradimin drejt Shqipërisë.
Ky shtetas ishte shpallur në kërkim ndërkombëtar nga Zyra Qendrore Kombëtare Interpol Tirana, pasi Gjykata e Rrethit Gjyqësor Tiranë, në vitin 2017, e ka dënuar këtë shtetas me 8 vjet burg, për veprën penale “Vjedhje me dhunë”
Ky shtetas në bashkëpunim me një tjetër person, në datë 15.07.2016, në Tiranë, i kanë vjedhur me dhunë çantën shtetases M. Ll.
Si rezultat i bashkëpunimit të Interpol Tirana me Interpol Athinën u bë i mundur arrestimi i këtij shtetasi duke u finalizuar me ekstradimin e tij drejt vendit tonë.
