Nga Emiratet e Bashkuara Arabe është ekstraduar në Shqipëri 39-vjeçari Kleviol Ahmeti, i njohur ndryshe si “Cllevio”, i kërkuar nga autoritetet shqiptare për veprat penale të “përndjekjes” dhe “largimit të të burgosurit nga vendi i qëndrimit”.
Operacioni u zhvillua në bashkëpunim mes Interpol Tiranës dhe Interpol Abu Dhabit, në kuadër të aksionit “The Wanted”, që synon kapjen dhe ekstradimin e personave të shpallur në kërkim ndërkombëtar, të cilët përpiqen t’i shpëtojnë drejtësisë duke u strehuar në Dubai.
Kleviol Ahmeti, 39 vjeç, me origjinë nga Lushnja, ishte shpallur në kërkim ndërkombëtar pasi Gjykata e Apelit të Juridiksionit të Përgjithshëm Tiranë i kishte caktuar në vitin 2024 masën e sigurisë “Arrest në burg” për veprën penale “Përndjekja”. Ai akuzohet se për një periudhë disa vjeçare ka përndjekur fizikisht dhe përmes rrjeteve sociale shtetasin R. R. dhe familjarë të tij.
Po ashtu, në të njëjtin vit, Gjykata e Fierit e ka dënuar me 9 muaj burg për veprën penale “Largimi i të burgosurit nga vendi i qëndrimit”, pasi kishte thyer masën e sigurisë të caktuar më herët.
Pas mbërritjes në Shqipëri, Kleviol Ahmeti do t’i dorëzohet autoriteteve përkatëse për të vuajtur dënimin dhe për t’u përballur me drejtësinë shqiptare.
