Dy persona të shumëkërkuar nga drejtësia shqiptare, Dashnor Dumani dhe Armis Stafa, pritet të ekstradohen sot nga Dubai drejt Tiranës, pas një operacioni të realizuar në bashkëpunim me autoritetet e Emirateve të Bashkuara Arabe.
Dashnor Dumani, vëllai i të penduarit të drejtësisë Nuredin Dumani, rezulton i dënuar për armëmbajtje pa leje dhe i akuzuar nga Gjykata e Posaçme për krime të rënda si vrasje dhe vjedhje me armë.
Ai dyshohet gjithashtu se ka marrë pjesë në masakrën e Bradasheshit, ku u vranë tre anëtarë të familjes Alibej.
Ndërkohë, Armis Stafa (i njohur dhe si Armees Stava), 36 vjeç, është arrestuar në Dubai më 27 maj, në zbatim të një urdhër-arresti ndërkombëtar të lëshuar nga drejtësia shqiptare.
Ai akuzohet për përfshirje në pastrimin e parave të një grupi kriminal në Elbasan, të drejtuar nga vëllezërit Franc dhe Hajdar Çopja. Hetimet e SPAK tregojnë se Stafa ka qenë pjesë e një skeme të ndërlikuar për pastrimin e fondeve, përmes transaksioneve të fshehta në tregun e automjeteve.
Të dy personat do të përballen me drejtësinë në kuadër të hetimeve të zgjeruara të SPAK për shkatërrimin e rrjeteve kriminale në vend.
Policia e Shtetit konfirmoi se ekstradimi i tyre është rezultat i një bashkëpunimi të ngushtë me autoritetet e Emirateve të Bashkuara Arabe dhe se për detaje të mëtejshme, përfshirë orën e mbërritjes, do të ketë njoftim zyrtar.
