Një denoncim i bërë në Gazetën Reforma tregon se shkatërrimi i bregdetit në Palasë vijon, ndërsa institucionet “kanë mbyllur sytë” përballë veprave të paligjshme të oligarkut Samir Mane.
Në videot dhe fotot e mëposhtme tregohet qartë se kamionë me gurë dhe me inerte janë duke u zbrazur në det, edhe pse me ligj kjo është e ndaluar. Asnjë institucion shtetëror nuk ka reaguar deri tani, ndërsa nuk dihet ende se çfarë pritet të ndërtohet në një distancë kaq të afërt, madje thuajse brenda në det, edhe pse ndërtime të tilla janë të ndaluara.
Por gjithë kjo heshtje institucionale e ka një arsye. Duke filluar nga ish-ministri i Mjedisit, Blendi Klosi, i cili jo vetëm për këtë rast, por sa herë zona të mbrojtura dhe monumente të mbrojtura shkatërrohen, nuk ka reaguar ndonjëherë.
Kujtojmë ngjarjen e një viti më parë, kur një anije ushtarake u mbyt me fundosje të kontrolluar në përballë resortit turistik “Green Coast”, të biznesmenit Samir Mane. Kapiteni i anijes, Artur Meçollari kishte dalë hapur kundër fundosjes së anijes, por ideja ishte mbështetuar dhe kërkuar nga ish-ministri i Mjedisit dhe i Turizmit, Blendi Klosi.
Shkak për të gjithë këtë ishte bërë përvetësimi i një pjese të fondit të mjeteve lundruese ushtarake, në llogari të oligarkëve që janë duke privatizuar çdo cep të bregdetit.
Dhe natyrisht që për çdo “punë” ka një shpërblim. Ish-ministri Blendi Klosi pushon i pashqetësuar në vilën nr.70 të resortit “Green Coast” të Samir Manes në Palasë. Vlera e kësaj vile shkon minimalisht në 500 mijë euro.
Me të tilla “dhurata” për ministra e deputetë, shkatërrimi i bregdetit të Palasës ka nisur e po vazhdon prej kohësh.
Në fund të vitit 2020 u dhanë mbi 16 miliardë lekë për rrugën e fshatit turistik të Samir Manes. Shkatërrimi ka vijuar me bekimin e institucioneve edhe për monumentin e natyrës në Rivierë “Deltën e Palasës”. Me ndërtimet në llogari të Samir Manes për “Green Coast”, një nga pasuritë më të rralla të brigjeve të Jonit, po shkatërrohet ditë pas dite. Një parkim i paligjshëm privat për llogari të resortit po privat, u ndërtua, duke bërë një krim të hapur ndaj natyrës. Gjurma e rrugës u zhvendos me disa metra dhe u fut në brendësi të Deltës, duke shkelur kaq hapur ligjin, por pa reagim nga ana e institucioneve.
Mirëpo këto nuk mjaftuan. “Green Coast” ofroi edhe “shërbim ekstra” për klientët e vetë me një pistë helikopterësh vetëm pak metra larg resortit. Këto shërbime të reja nuk janë një investim i “Green Coast”, por pjesë e projektit të Fondit Shqiptar të Zhvillimit me një kosto për taksapaguesit shqiptarë prej 93.8 milionë lekësh (762 mijë euro). Mbi të gjitha, punimet për këto projekte u nisën pa leje dhe po dëmtojnë në formë të pakthyeshme monumentin natyror “Delta e Përroit të Palasës”.
