Kompania Kreatx, pas së cilës fshihet vëllai i Damian Gjiknurit vazhdon të fitojë qindra milionë lekë nga tenderët e Agjencisë Kombëtare Shoqëria e Informacionit.
Panajot Gjiknuri është përfolur se është menaxher de facto i një konsorciumi kompanish ku bën pjesë edhe Kreatx. Edhe kur AKSHI nuk arrin ta nxjerrë fituese këtë kompani, Gjiknuri ka përkrahjen e kryetarit të Komisionit të Prokurimit Publik (KPP) Jonaid Myzyri.
Rasti i freskët është përmbysja e tenderit të AKSHI-t ne ndihmën e Myzyrit në KPP. Në lojë janë 1,3 miliard lekë që AKSHI i vë në dispozicion për ndërtimin e “Sistemit të bazës së të dhënave për Trafikun Detar” në Portin e Durrësit.
Tenderi
Shpallja e tenderit u bë nga AKSHI më 29 shtator 2020 dhe u njoftua në sistemin e prokurimeve elektronike me procedurë prokurimi të hapur. Fondi limit i vendosur nga agjencia ishte 130,126,659 lekë pa TVSH. Ofertat u hapën në datën 23 tetor 2020. Një muaj më vonë, në 12 nëntor AKSHI njoftoi rezultatet e vlerësimit: Kreatex 99,750,000 lekë, i skualifikuar; Ikub Info 123,099,819 i kualifikuar; Divitech 125,561,815.38, i skualifikuar; Smart ICT Services 153,832,132.80 i skualifikuar.
Bashkimi i kompanive KREATX, Sinteza, Keminet, u bë pasi nuk plotësonin kriterin stafit, konkretisht duhet të ishin specialistë të certifikuar nga prodhuesi për zhvillim software.
Myzyri i kthen nderin Gjiknurit
Më 22 dhjetor 2020 Komisioni i Prokurimit Publik, e drejtuar nga Jonaid Myzyri e ka përmbysur vendimi e AKSHI-t dhe ka kërkuar që tenderi të anulohet. Arsyetimi është se kërkesat e AKSHI-it për licencat e stafit qenka në tejkalim të ligjit për Prokurimet.
Kështu, Joanaid Myzyri i kthen borxhin Gjiknurit, pasi u emërua në korrik të vitit të kaluar në këtë post jashtë kritereve të përcaktuara me ligj. Myzyri nuk plotësonte kriterin e vjetërisë për t’u vendosur në këtë detyrë.
Merr fondet nuk kryen punën
Një tender tjetër, Panajot Gjiknuri e mori nga DPSHTRR, në vitin 2017. Ky bashkim shoqërish, që menaxhohen nga Panajot Gjiknuri duhet ta mbaronte punën në qershor të vitit 2018, por edhe me ardhjen e drejtor Blendi Gonxhes akoma nuk ishin dorëzuar sistemet informatike sipas kontratës.
Kompania Kreatx, sipas ekstraktit të nxjerrë në QKB është krijuar në shtator 2011 me aktivitet zhvillimin dhe shitjen e programeve kompjuterike për përdorim në fusha te ndryshme. Megjithatë është bërë aktive me bilance vetëm pas vitit 2013, me ardhjen në pushtet të PS-së. /Gazetareforma.com/
