Presidenti Ilir Meta ka bërë presion mbi Kuvendin për ta ndryshuar ligjin “Mbi shtetësinë” me qëllim që të kishte dorë të lirë në firmosjen e pasaportave shqiptare për të huajt.
Dekreti
Dekreti i Metës, në 11 gusht 2020 “Për kthimin në Kuvend te ligjit “Për shtetësinë'”‘, së bashku me arsyet e kthimit të ligjit”, është dokumenti që tregon rivalitetin mes qeverisë dhe Presidentit për dhënien e shtetësisë së huajve. Meta është përpjekur të ruajë formën e vjetër të dhënies së shtetësisë, duke e justifikuar me autoritetin që i jep Kushtetuta. Është fjala për të drejtën që të japë shtetësinë pa kaluar në procedurat e verifikimit nga organet e tjera.
Deri tani, në tre vitet e Presidencës Meta, 382 të huajt kanë marrë shtetësi shqiptare në emër të ‘interesit kombëtar’ pa u verifikuar për sigurinë.
Presidenti është bazuar në nenin 7 të pikës 9 të ligjit për shtetësinë, kjo pikë parashikon në çdo rast zbatimin e pikës 6 të nenin 9, e cila kërkon verifikimin e personit që i jepet nënshtetësia nëse përbën apo jo kërcënim për sigurinë kombëtare. Rasti më flagrant është me futbollistin afrikan Winnful Essua Joseph Cobbina, të cilit Meta i dha shtetësinë brenda disa orëve.
Më së shumti, Presidenti Meta ka anashkaluar Ministrinë e Brendshme e cila ka për detyrë për të verifikuar të shkuarën e të huajve që kërkojnë shtetësinë shqiptare. Procedura e zakonshme merr rreth 1 vit, pasi kthehen përgjigjet e institucioneve, por ky nen i ka dhënë të drejtën Metës të veprojë në çast, sipas bindjes së tij.
Ligji
Neni 9 i ligjit titullohet “rastet e veçanta të fitimit të shtetësisë shqiptare”. Sipas këtij neni shtetësia shqiptare mund të fitohet nga shtetasi i huaj edhe në rastet kur Republika e Shqipërisë ka interes kombëtar apo interes në fushën e arsimit, shkencës, artit, kulturës, ekonomisë e sportit. Për hartimin e programeve të veçanta, përcaktimin e rregullave specifike të kontrollit të veçantë të sigurisë dhe pastërtisë së figurës në standardet më të larta dhe monitorimin e zbatimit të tyre, krijohet një agjenci shtetërore e posaçme në varësi të ministrit. Organizimi dhe funksionimi i agjencisë miratohet me vendim të Këshillit të Ministrave. Kriteret për fitimin e shtetësisë miratohen me vendim të Këshillit të Ministrave.
Kundërshtimi
Lidhur me nenin 9, Presidenti i shkruante ndër të tjera deputetëve, se “shkel nenin 19 dhe 92 të Kushtetutës, si dhe mbivendos organet shtetërore duke dubluar kompetencat dhe fryre administratën, në shkelje te eficencës dhe duke shkaktuar kosto direkte mbi buxhetin e shtetit”
Procedurat
Ky ligj megjithëse ka hyrë në fuqi nuk ka nisur zbatimin, sepse akoma nuk është ngritur agjencia e mësipërme, as nuk është miratuar ndonjë vendim për kriteret.
Ministria e Brendshme në seksionin si aplikohet për shtetësinë, vazhdon ti referohet akoma Ligjit nr. 8389, date 05.08.1998 “Per shtetesine shqiptare”.
Procedura përfshin një kërkesë drejtuar Presidentit të Republikës, Certifikata e lindjes, certifikatë, lejeqëndrimi në Republikën e Shqipërisë, akti i pronësisë së banesës ose kontrata e qirasë, kontratë pune, dokumente që vërtetojnë disponimin e mjeteve financiare të mjaftueshme për jetesë (si garanci bankare, librezë kursimi, vërtetime zyrtare të ardhurash) dëshmi penaliteti, fotografi.
/GazetaReforma.com/
