Pasi u largua nga karrigia e presidentit, Ilir Meta tashmë është rikthyer fuqishëm në “skenën e nxehtë politike”.
Kryetari i partisë së Lirisë, Ilir Meta deklaroi për mediat se kryeministri Edi Rama ishte i aftë vetëm për të vjedhur. Duke përmendur rastet e skandaleve të publikuara për inceneratorët, Meta tha se ky nuk ishte rezultat i një paaftësie por i një babëzie për të vjedhur çdo gjë që në buxhetin e shtetit.
“Qeveria ecën me një vrap të jashtëzakonshëm për të plaçkitur dhe për të vjedhur sepse e ka të qartë rrugën e saj, ne duhet të ecim me ritëm shumë herë më të shpejtë kundër korrupsionit. Edi Rama, një vjedhës i pamëshirshëm që vjedh çdo gjë. Vjedh jo vetëm përmes buxhetit por edhe përmes vjedhjes së të dhënave, duke përdorur firmat e atyre që kanë ikur nga kjo botë për të vjedhur.
Mua më vjen keq për socialistët, të shkretët të cilët janë marrë peng. Ky është mjeshtër i paparë për të korruptuar, për të kapur për të përçarë prandaj i ka katandisur në atë gjendje. Ky vjedh edhe në fatkeqësi, shkëlqen edhe në pandemi. Shikoni sa ka marrë një familje shqiptare gjatë pandemisë, gati zero. Shikoni sa kanë marrë në Serbi dhe rajon. Edhe në pandemi lekët jepeshin për projekte të cilat nga 2 milion që kushtonte shkonte 20 milionë. Ju mendoni se ky është i paaftë? Jo! Është i pacipë! Sepse për të vjedhur të dhënat është i aftë, ndërsa për këto të tjerat na qenka i paaftë”, deklaroi Meta.
