Kryeministri në detyrë i Kosovës, Ramush Haradinaj, ka dhënë një intervistë për Kosova Press.
Më herët, Haradinaj ka deklaruar se ‘Mini-Shengeni Ballkanik’ kishte si qëllim heqjen e taksës ndaj Serbisë.
Mirëpo, Rama e përgënjeshtroi këtë gjë dhe e quajti atë ‘gënjeshtar’.
Së fundmi, Harajdinaj i është përgjigjur kësaj akuze.
Ramush Haradinaj thotë se përmes “Mini-Shengenit” të gjithë ata që kanë investuar në ekonominë e Serbisë, përfshirë Rusinë, do të mund të kishin edhe Kosovën si treg.
Ai shton se Rama duhet të kuptojë që në Kosovë njerëzit “nuk hanë bar”.
“Po ai po bëhet nervoz, ai duhet ta kuptojë që bari nuk hamë në Kosovë, ne me këto tema jetojmë gjithë kohën, ne nuk kemi qare pa i nxjerr në dritë këto probleme, nuk mundemi me i hesht. Imagjinoni unë me hesht presionin për ndarje të Kosovës ose presionin që me i bë Kosovës lojëra të ndryshme që me kyç në ndonjë proces ku Kosova nuk vjen në sistem realisht, në mënyrë që Kosova me heq taksën dhe Serbia të përfitojë prej tregut tonë pa asnjë efekt pozitiv për Kosovën, kjo është e pakuptimtë”, tha Haradinaj.
Kryeministri aktual i Kosovës shtroi idenë se mund të bëhet “Mini-Shengen” Kosovë-Shqipëri bilateral, por jo një i tillë duke përfshirë Serbinë.
Sipas tij, taksa në ‘Rrugën e Kombit’ duhet të hiqet, që të largohen pengesat dhe të krijohet më shumë infrastrukturë e ndërsjellë.
Por, shfaqet skeptik tek thotë se taksën nuk do ta heq as Qeveria e re e Kosovës.
Po ashtu, Haradinaj u ndal edhe te mundësia që Albin Kurti të qeverisë Kosovën.
Sipas tij, Kurti është jashtë temave politike.
Ramush Haradinaj po vazhdon të drejtojë Qeverinë e Kosovës , pasi partitë fituese të zgjedhjeve të 6 tetorit, Lëvizja Vetëvendosje dhe Lidhja Demokratike e Kosovës, ende nuk kanë rënë dakord për formimin e një koalicioni qeverisës.
