Fitim Dumani, vëllai i të arrestuarit dhe të penduarit të drejtësisë, Nuredin Dumani, ka dhënë detaje mbi fatin e të shumëkërkuarit Talo Çela.
Në një intervistë të fundit, ai ka deklaruar se Çela është vrarë në një restorant në Elbasan, gjatë një momenti kur po konsumonte ushqim. Sipas tij, ekzekutimi është kryer nga vëllezërit Çopja, të cilët kanë vepruar për të mos lejuar që Çela të fliste mbi çështje që i implikonin.
“Janë prishur për 10 mijë euro që Altin Ndoci i kishte borxh Dashnorit. Altini ishte ushtar i Talos, dora e parë që njihej me Çopjat. Talo Çelën e kanë vrarë duke ngrënë bukë, në restorant në Elbasan. U vra nga vëllezërit Çopja. Vetë restoranti ishte i tyre. E vranë që mos të fliste, e vranë që të humbnin gjurmët”, tha Fitim Dumani.
Ky version i fundit shton dyshimet dhe misterin mbi fatin e Talo Çelës, një prej emrave më të kërkuar të botës së krimit në Shqipëri.
