Një lajm i trishtë vjen nga Gjermania, ku përmbytjet kanë shkaktuar qindra viktima, në mesin e të cilave është edhe një vajzë nga Kosova.
Mediat kosovare shkruajnë se vajza që ka humbur jetën është Vanesa Koxha, me prejardhje nga Kaçanaku. Lajmi për ndarjen e saj nga jeta është bërë nga familjarët e saj në rrjetet sociale.
Ditën e djeshme gjithashtu dy shqiptarë mbetën viktima të përmbytjeve në Gjermani. Bëhej fjalë për një çift nga Peja, ndërsa lidhur me lajmin reagoi edhe Ministria e Jashtme e Kosovës.
“MPJD është në komunikim të vazhdueshëm me autoritetet gjermane përmes Ambasadës së Kosovës në Gjermani, dhe deri në këto momente ende nuk ka marrë konfirmim nga autoritetet përkatëse lidhur me dyshimet për humbjen e jetës së dy bashkatdhetarëve”, thuhej në reagimin e ministrisë.
Ndërkohë, përmbytjet në Gjermani kanë marrë më shumë se 200 jetë njerëzish, ndërsa mijëra të tjerë janë raportuar të zhdukur. Autoritetet u gjendën të papërgatitura përballë reshjeve të dendura që shkaktuan vërshimin e lumenjve duke përmbytur shtëpitë dhe rrugët.
Situata kritike paraqitet edhe në Belgjikë ku më shumë se 35 persona kanë humbur jetën dhe më shumë se 100 të tjerë raportohen të zhdukur. Nga përmbytjet janë prekur gjithashtu edhe Holanda, Luksemburgu e Zvicra.
