Një lajm i trishtë për sportin shqiptar ditën e sotme ndarja nga jeta e mjekut fizioterapist të Kombëtares së Futbollit, Ylli Mihali. Ai u nda nga jeta në moshë të re, pasi nuk mundi ta fitonte betejën me Covid-19.
Në një postim në Facebook, presidenti i FSHF, Armand Duka ka shprehur ngushëllimet e tij, ndërsa thotë se humori, dashuria për njerëzit dhe dembushria e Ylli Mihalit do të mungojnë.
Mihali shërbeu për 27 vite pranë ekipit Kombëtar dhe pranë klubit të Tiranës, duke u gjendur pranë sportistëve në çdo situatë.
Postimi i plotë i Dukës:
Të dashur miq,
Pak minuta më parë u njoha me lajmin e kobshëm se Ylli Mihali, njeriu i mirë, fjalëpak, u nda nga jeta pas një betejë të gjatë e stërmunduese me Covid-19.
Ky është një moment i vështirë për të gjithë futbollin shqiptar, që e njofti dhe e dashuroi aq shumë Yllin, që emrin e reflektonte në ҫdo hap dhe moment të jetës së tij. Një fizioterapist dhe një njeri i jashtëzakonshëm që shërbeu për 27 vite pranë ekipit tonë Kombëtar, pranë klubit të tij Tiranës, pranë sportistëve në vështirësi, duke qënë pranë tyre në ҫdo situatë.
Humori, dashuria për njerzit, dhembshuria e Yllit do të na mungojnë. Në këtë moment të vështirë për familjen e tij, miqtë e tij të shumtë, lutemi që shpirti i tij të prehet në paqe.
Lamtumirë Yll, do të të kujtojmë gjithmonë me dashuri!
