Covid i merr jetën dy personave mëngjesin e sotëm. Një prej viktimave është inspektoi i policisë Bujar Mema, 49 vjeç, nga qyteti i Fierit.
Mema ishte infektuar me virusin dy javë më parë dhe ishte i shtruar në një nga spitalet e Covid këtu në kryeqytet.
Ai ka ndërruar jetë pas komplikacioneve nga virusi i rrezikshëm. Ndarja para kohe e tij nga jeta është një humbje e madhe për familjen dhe të afërmit. Bujari ishte baba i dy djemve.
Për kolegët e Drejtorisë së Policisë së Fierit, Bujari njihej për korrektësinë në detyrë dhe ishte i respektuar nga të gjithë.
Rasti tjetër është njoftuar nga kryetarja e LSI, Monika Kryemadhi, e cila ka dërguar një mesazh ngushëllimi për koordinatorin e kësaj partie në Astir.
Viktima sapo ishte kthyer nga Gjermania dhe do e ndihmonte për fushatën elektorale. Ajo ka publikuar edhe mesazhin e tij të fundit 30 ditë më parë ku i shkruante: ”Mona si je? Fëmijet si janë? Unë kam ardhur dhe më ke deri në fund të fushatës.”
Kryemadhi thotë se Eno do i mungojë për shakatë e tij, por i premton se familja e tij nuk do të jetë kurrë vetëm.
STATUSI NGA MONIKA KRYEMADHI
Mona si je? Fëmijet si janë? Unë kam ardhur dhe më ke deri në fund të fushatës.
Ky ishte mesazhi yt para 30 ditësh, kur më the se ishe kthyer nga Gjermania. Por dje, të gjithë u ndalëm, nuk folëm, shtangëm, sepse ti ike dhe na le përgjithmonë. Nuk duam të të përcjellim, të duam për vete, të duam këtu me ne. Por ti zgjodhe të ikësh sepse parajsa është më e mirë sesa kjo botë këtu e padrejtë.
Eno, ti ike dhe le vetëm Mirën me fëmijët, por të premtoj se ata nuk do të jenë kurrë vetëm, ne do jemi aty për ta gjithmonë.
Të duam Eno jonë, do na mungosh me shakatë e tua.
