Kryeministri Edi Rama mbrëmjen e djeshme i pyetur nga Blendi Fevziu teksa kishte përballë Hashim Thaçin, se kur do të hapej kufiri mes Kosovës dhe Shqipërisë, tha se: “Po, dakord, patjetër, ne jemi gati, por po presim të koordinohen në Kosovë të gjithë që ta dimë që me kë do të flasim atje ndërkohë që do të hapim apo s’do ta hapim.”
Batuta e Ramës u shoqërua nga të qeshurat e presidentit Hashim Thaçi.
Kjo vjen pas krizës politike në Kosovë dhe rrëzimit të Kurtit, me të cilin Rama nuk shquhet për marrëdhënie të mira.
Kështu, ditën e sotme kryeministri në detyrë, Albin Kurti në një konferencë për media ka komentuar edhe thumbin e homologut shqiptar, duke thënë se ai është kryeministër në detyrë, dhe nuk ka dilema për këtë se kush e përfaqëson Kosovën.
“Unë nuk e kam parë atë emision, por ne jemi të interesuar se porsa të hapen sadopak kushtet ta bëjmë këtë hapje të kufirit, veçse ta dini që vendimet tona, nuk janë politike, nuk janë demokratike sa janë shkencore, sepse bazohen në rekomandimet e Institutit Kombëtarë të Shëndetësisë Publike. Unë jam kryeministër në detyrë, unë nuk kam dilema për këtë gjë, kush ka dilema duhet të pyeten ata. Dje kam takuar ambasadorin e Republikës së Shqipërisë, ku kemi biseduar për shumë gjëra, ndër të cilat edhe hapja e kufirit”, tha Kurti.
Kujtojmë se më 25 mars ‘qeveria Kurti’, e cila u formua 3 muaj pas zgjedhjeve të 6 tetorit, ra pas 51 ditësh në pushtet, duke u bërë qeveria më jetëshkurtër.
LEXO: Qeveria më ‘jetëshkurtër’/ Votohet mocioni i mosbesimit, bie qeveria e Albin Kurtit
Më 30 prill, presidenti i Kosovës Hashim Thaçi dekretoi kandidatin e Lidhjes Demokratike të Kosovës, Avdullah Hoti, për pozitën e kryeministrit të ardhshëm të Kosovës.
LEXO: Thaçi dekreton Avdullah Hotin për kryeministër të Kosovës
Në po të njëjtën ditë, Lëvizja Vetëvendosje i është drejtuar Gjykatës Kushtetuese me pretendimin se presidenti ka marrë vendim kundërkushtetues.
Gjykata Kushtetuese ka vendosur masë të përkohshme deri më 29 maj duke pezulluar deri në një vendim të plotë dekretin e presidentit Hashim Thaçi për të mandatuar Avdullah Hotin e Lidhjes Demokratike të Kosovës për kryeministër.
LEXO: Gjykata Kushtetuese pezullon deri më 29 maj dekretin e Thaçit për qeverinë e re
Kryeministri në detyrë i Kosovës, Albin Kurti, më 2 maj, i ka dërguar kërkesë për opinion në Komisionin e Venecias në lidhje me kompetencat e Presidentit të Kosovës në shpërndarjen e Kuvendit dhe në kompetencat e tij për propozimin e mandatarit për kryeministër të vendit, pas mocionit të suksesshëm të mosbesimit.
Ditën e sotme, Komisioni i Venecias këtë të martë i ka kthyer përgjigje kryeministrit në Detyrë Albin Kurti, në lidhje me kërkesën për opinion në raport me kompetencat e Presidentit.
Në një njoftim për mediat Komisioni ka vlerësuar se duhet të pritet vendimi i Gjykatës Kushtetuese të Kosovës rreth kësaj çështje.
Kjo ka qenë hera e parë që Kosova ka dërguar kërkesë për opinion në Komisionin e Venecias, në lidhje me raportin e institucioneve kushtetuese dhe kompetencat e tyre.
