Udhëheqësi Suprem i Iranit, Ali Khamenei, ka reaguar me tone triumfuese në një mesazh të publikuar në rrjetin social X dhe në televizionin shtetëror, ku përshëndeti atë që e cilësoi si “fitoren e madhe të kombit iranian” kundër Izraelit dhe Shteteve të Bashkuara.
“Pavarësisht gjithë propagandës dhe zhurmës së krijuar, regjimi sionist, nën goditjet e Republikës Islamike, është në prag të shembjes. Ai është shtypur,” deklaroi Khamenei, duke iu referuar konfliktit 12-ditor si një sukses të rëndësishëm për Iranin.
Në vijim, ai shtoi se “Shtetet e Bashkuara u përfshinë drejtpërdrejt në konflikt për të shpëtuar Izraelin, por nuk arritën asgjë. Në vend të një fitoreje, ata morën një shuplakë të rëndë nga Republika Islamike.”
Ndërkohë, tensionet midis Iranit dhe komunitetit ndërkombëtar janë shtuar edhe më tej pas miratimit nga Këshilli i Gardës Revolucionare të një ligji që pezullon bashkëpunimin me Agjencinë Ndërkombëtare për Energjinë Atomike. Vendimi erdhi pas sulmeve të fundit të Izraelit dhe akuzave të drejtuara ndaj kreut të IAEA-së, Rafael Grossi.
Sipas kanalit opozitar “Iran International”, i cili citon burime brenda medias shtetërore iraniane, Këshilli ka mbështetur vendimin e parlamentit për të ndërprerë bashkëpunimin me agjencinë atomike të OKB-së, duke përshkallëzuar tensionet në një moment kritik për diplomacinë ndërkombëtare.
Zëdhënësi i Ministrisë së Jashtme iraniane, Esmail Baghaei, në një intervistë për Al Jazeera, theksoi se Irani ka të drejtën e plotë për të zhvilluar energji bërthamore për qëllime paqësore, në përputhje me nenin 4 të Traktatit për Mospërhapjen Bërthamore.
Ai akuzoi Shtetet e Bashkuara për shkatërrimin e diplomacisë përmes sulmeve në objektet bërthamore të Iranit dhe tha se Washingtoni duhet të mbajë përgjegjësi për veprimet e ndërmarra në bashkëpunim me Izraelin.
