Një ngjarje e rëndë është regjistruar mbrëmjen e sotme në spitalin e qytetit të Pogradecit. Mësohet se një grua e moshës 46-vjeçare Anila Bazelli, me profesion mësuese ka humbur jetën në spital, në rrethana ende të paqarta.
Siç mësohet nga burime pranë spitalit, 46-vjeçarja është paraqitur në spital e shoqëruar nga familjarë rreth orës 19:00, pasi nuk ishte ndjerë mirë, por gjendja e saj ishte përkeqësuar minuta pas mbërritjes në spital, duke ndërruar jetë.
Mësohet se familjarët kanë akuzuar mjekët dhe infermierët e urgjencës për mjekim të gabuar. 46-vjeçarja Anila Bazelli është transferuar në morgun e qytetit, por autopsia do të kryhet nga ekspertë nga Tirana, nisur edhe nga pretendimet e familjarëve.
Ka qenë prokuroria, ajo e cila ka kërkuar ekspertizën nga kryeqyteti, për të zbardhur rrethanat e vërteta të vdekjes së 46-vjeçares, e cila sipas familjarëve, nuk vuante nga ndonjë sëmundje.
Nuk dihen ende arsyet dhe shkaqet e kësaj ngjarje fatale, që pse e kanë çuar 46-vjeçaren Anila Bazelli drejt humbjes së jetës, pasi rrethanat janë ende të paqarta.
Policia dhe prokuroria vijojnë hetimet së bashku me shërbimet e tjera të emergjencës për të zbardhur arsyet e plota të ngjarjes së ndodhur mbrëmjen e sotme me pasoja fatale në spitalin e Pogradecit.
