Një ngjarje e rëndë ka ndodhur në Përmet ku një grua e moshuar ka tentuar t’i japë fund jetës. Bëhet e ditur se gruaja rreth moshës 75 vjeç është vetëhedhur nga ura në hyrje të qytetit, teksa më vonë është gjetur nga disa të rinj që janë gjendur aty rastësisht. Ata pasi e kanë parë të moshuarën duke u mbytur në rrjedhën e Vjosës, janë hedhur për ta shpëtuar dhe më pas e kanë dërguar atë në spital.
Mësohet se 75-vjeçarja është jashtë rrezikut për jetën teksa mësohet se gruaja e ka kryer aktin në gjendje të rënduar psikologjike. Në vendngjarje ndodhet grupi hetimor i cili po punon për dokumentimin e plotë të rrethanave të kësaj ngjarjeje.
Njoftimi i policisë:
Rreth orës 14:15, në hyrje të qytetit të Përmetit, dyshohet se është vetëhedhur në lumin Vjosë, shtetasja F. D., rreth 75 vjeçe.
Menjëherë pas marrjes së njoftimit, në vendngjarje kanë shkuar shërbimet e Policisë, të cilët në bashkëpunim me qytetarët, kanë bërë të mundur nxjerrjen e kësaj shtetaseje, nga ujërat e lumit. Shtetasja F. D. u transportua në spital për të marrë ndihmën mjekësore dhe është jashtë rrezikut për jetën. Në vendngjarje ndodhet grupi hetimor i cili po punon për dokumentimin e plotë të rrethanave të kësaj ngjarjeje.
