Një ngjarje tragjike ka ndodhur në Volvera, një qytet afër Torinos, ku një konflikt mbi çështje bashkëpronësie u shndërrua në një masakër.
Andrea Longo, një shofer kamioni 34-vjeçar me precedentë penalë, vrau dy fqinjët e tij me thikë dhe më pas i dha fund jetës së tij.
Ngjarja ndodhi gjatë orëve të para të mëngjesit në një ndërtesë në Via XXIV Maggio. Pas një debati të ashpër, Longo mori një thikë dhe sulmoi Chiara Spatola, 28 vjeçe, dhe Simone Sorrentino, 23 vjeç, duke i goditur disa herë.
Dy të rinjtë tentuan të arratiseshin, por Longo i ndoqi dhe i vrau në oborrin e ndërtesës.
Pavarësisht përpjekjeve të karabinierëve dhe ekipeve të urgjencës, të tre personat u gjetën të pajetë në vendngjarje.
Hetimet janë ende në proces, por fillimisht po dyshohet se konflikti ka pasur të bëjë me tensione të mëparshme mes palëve dhe planet e çiftit të ri për t’u zhvendosur në një tjetër zonë, në Rivalta Torinese.
